Смачненькая салата 3 Пяшчотная салата 3




Дата канвертавання19.11.2017
Памер319.96 Kb.

Зьмест


Зьмест 1

Салаты 3


Смачненькая салата 3

Пяшчотная салата 3

Салата з кукурузай і крабавымі палачкамі 3

“Селядзец пад футрам” 3

Слаёная салата з курыцай 3

Слаёная салата з курыцай і чарнасьліўкамі 4

Салата з пэкінскай капусты і кукурузы 4

Вінэгрэт 4

Чарапаха 4

Вясёлкавая салата 4

Салата з кальмарам і гарошкам 5

Простая салата з кальмарам 5

Ласосевая салата 5

Магрыб 5


Салата з авакада 5

Салата з грыбочкамі 6

Чырвонае лобіа 6

Фантазійная салата з журавінамі 6

Пірагі і піражкі 7

Пірог з капусты 7

Пірог з цыбулі 7

Мясны торт 8

Піражкі бульбяныя з грыбамі 8

Сырныя кувэрцікі 9

Сачні з тварагом 9

Проста ежа 10

Дранікі 10

Зацірка 10

Запяканка з бульбы і яек 10

Галубцы 10

Сырнікі 10

Рыба ў белым сосе 11

Цеста для піцы 11

Плоў 11


Капусткіны кветкі з сырам 11

Катлеты з бульбы і капусты 12

Мачанка па-сялянску 12

Бабка з грыбамі 12

Спагеці карбанара 12

Рыба па-манастырску 12

Стравы зь мяса 14

Курыныя кумпячкі ў сосе 14

Курыца на бутэльцы 14

Мяска па-албанску 14

Сьвініна з плаўленым сырам 14

Ялавічына зь вяршкамі 14

Ялавічына па-фламандзку 15

Супы і сосы 16

Булён курыны з клёцкамі 16

Французскі цыбулевы суп з крутонамі 16

Ласункі 17

Яблычная казка 17

Яблычны штрудэль 17

Яблычны пірог 17

Французскія палачкі 18

Мядовы корж 18

Заварны пуш 18

Печыва зь півам 18

Маміна шарлотка 18

Медавуха 18

Зёлкі 19

Арэгана 19

Базілік 19

Гвазьдзікі 19

Імберац 19

Кардамон 19

Кары 19

Карыяндар 19



Кроп 19

Куркума 20

Маяранак 20

Мускатны арэх 20

Перац чылі 20

Пятрушка 20

Размарын 20

Фенхель 20

Хмелі-сунэлі 20

Цынамон 20

Часнык 21

Шафран 21

Наша Страва ©NN 22

Бігас з грыбамі 22

Бігас зь яблыкамі 22

Слоенае цеста на кулябякі 22

Кулябяка па-сапегаўску 22

Кулябяка па-радзівілаўску 23

Цеста на калдуны 23

Цеста ліцьвінскае 23

Фарш віленскі грыбны 23

Тышкевічаўскія калдуны 23

Зразы па-наску 24

Зразы з бульбы 24

Верашчака з салам і сэльдэрэем 24

Верашчака арыгінальная, «кухмістарская» 24

Судак па-радзівілаўску 25




Салаты

Смачненькая салата


Трэба: 2 памідоркі, 1 салодкі перчык, 2-3 бульбінкі, 100-150 г. сыру, 5-6 масьлінак, 200 г. кукурузы, маянэз.

Памідоркі, перчык і гатаваныя бульбінкі парэзаць маленькімі кубікамі. Пацерці сыр. Дробна парэзаць масьлінкі. Дадаць 200 г. кукурузы (можна меней ці болей :), ці зусім не дадаваць). Усё перамяшаць, заправіць маянэзам.

спісана ў Камілкі

Пяшчотная салата


Трэба: 1 сярэдніх памераў яблык, 1-2 яйкі, 50-100 г. сыру, маянэз, соль.

Пацерці ці вельмі дробна нарэзаць яблык, звараныя яйкі, сыр. Пакласьці ўсё слаямі ў гэткім жа парадку на плыткую талерку, змазваючы кожны слой маянэзам. Пасаліць.

спісана ў мамы

Салата з кукурузай і крабавымі палачкамі


Трэба: 250 г. крабавых палачак, 1/3 шкл. рысавай крупы, 3 яйкі, 150 г. кансерваванай кукурузы, 125 г. кансерваваных шампіньёнаў, 150 г. марынаваных агуркоў, 1 цыбуліна, маянэз, пятрушка, хрэн, соль, перац.

Зварыць і асьцюдзіць рыс. Нарэзаць крабавыя палачкі, звараныя яйкі, агуркі, грыбы. Зьмяшаць з рысам, кукурузай, дробна скрышанай цыбуляй. Заправіць хрэнам і перцам.


“Селядзец пад футрам”


Трэба: селядзец, 2-3 бульбіны, велькая морква, 1 сярэдні бурак, 2 яйкі, цыбуліна, маянэз.

Пачысьціць селядзец ад костак і парэзаць кубікамі. Зварыць гародніну і паасобку парэзаць. На дно плыткай пасудзіны пакласьці спачатку бульбу, потым селядзец, дробна пакрышаную цыбулю, яйкі, моркву і бурак. Кожны слой трэба паліваць невялікай колькасьцю маянэзу. Прыгатаваць загадзя і паставіць у лядоўню каб прапіталася.


Слаёная салата з курыцай


Трэба: 250 г. сыру, 2-3 вараныя бульбіны, 300-400 г. варанае курыцы, бляшанка марынаваных шампіньёнаў, 3 вараныя яйкі, маянэз.

Салату выкладаць па слоях, кожны слой прамазваць маянэзам. Першым слоем пакласьці пацёрты сыр, потым дробна парэзаную бульбу, потым парэзаную курыцу, яйкі і нарэшце грыбы. Грыбы пасаліць. Зьверху салату таксама заліць маянэзам.

Курыцай гэтую салату не папсуеш - можна дадаваць і болей чым у рэцэпце.

спісана ў Ганны Паўлаўны


Слаёная салата з курыцай і чарнасьліўкамі


Трэба: 10-15 чарнасьлівак, 300-400 г. варанай курыцы, 200-300 г. шампіньёнаў, 4 вараныя яйкі, 1-2 цыбуліны, сьвежы агурок.

Чарнасьліўкі заліць кіпнем каб разьмяклі, дробна парэзаць і пакласьці на дно салатніцы. Другім слоем пакласьці парэзаную курыцу, потым абсмажаныя з цыбуляй грыбы, цёртыя яйкі. Усё добра паліць маянэзам. Зьверху пацерці сьвежы агурок.


Салата з пэкінскай капусты і кукурузы


Трэба: пэкінская капуста, 150 г. вяндліны, 150 г. сыру, 2-3 ст. лыжкі салодкай кукурузы, 2 вараныя яйкі, маянэз.

Капусту трэба ня надта дробна парэзаць. Вяндліну прыгожа парэзаць стужкамі шырынёй 7 мм і таўшчынёй 2 мм. Сыр таксама лепей парэзаць саломкай, але можна пацерці. Заправіць маянэзам.


Вінэгрэт


Трэба: 150 г. бурака, 300 г. бульбы, 300 г. салёных агуркоў, 300 г. кіслай капусты, 150 г. цыбулі, алей.

Зварыць бульбу і буракі. Парэзаць на дробныя кубікі буракі, бульбу, агуркі, цыбулю. Калі капуста буйна нашынкаваная, яе таксама парэзаць. Усё зьмяшаць, пасаліць, заправіць алеем.


Чарапаха


Трэба: палова курыцы, 100 г. сыру, 3 яйкі, морква, яйкі, цыбуля, грэцкія арэхі.

Выкладваць па-слаёх: вараная курыца, цёрты сыр, вараная морква, бялок, цыбуля, жаўток. Паўтарыць двойчы. Кожны слой прамазаць маянэзам. Зьверху ўпрыгожыць “чарапашкамі” грэцкіх арэхаў.


Вясёлкавая салата


Трэба: цыбуля, мяса, бульба, бурак, морква, капуста, зялёны гарошак, маянэз.

Салата выкладаецца на велькую пасудзіну кучкамі: 1-я кучка – дробна пакрышаная цыбуля (рэпчатая); 2-я - мяса, нарэзанае саломкай і абсмажанае ў алеі; 3-я - бульба, нарэзаная саломкай і абсмажаная; 4-я – сьцёрты на буйной драчцы вараны бурак; 5-я – сьцёртая вараная морква; 6-я – сьвежая капуста, пакрышаная і запраўленая сольлю й цукрам; 7-я – гарошак.

Кожная кучка асобна павінна быць палітая маянэзам. Калі госьці расьсядуцца і паглядзяць на вясёлку, можна перамяшаць.

Салата з кальмарам і гарошкам


Трэба: 200 г кальмара, 3 бульбіны, 2 морквы, 1 салёны агурок, 100 г зялёнага гарошку, 100 г маянэзу, 1 яйка, перац, соль.

Кальмара зварыць (3-5 хв у кіпячай падсоленай вадзе), асьцюдзіць, пакрышыць саломкай. Дробна нарэзаць вараную бульбу і моркву, салёны агурок, дадаць гарошак. Усё перамяшаць, заправіць маянэзам, пасаліць, папярчыць. Зьверху ўпрыгожыць скрылёчкамі крутога яйка.


Простая салата з кальмарам


Трэба: 500 г кальмара, 1 цыбуліна, 2 вараныя яйкі, маянэз, 2 ст лыжкі рубленай зеляніны (пятрушка, кроп).

Кальмара зварыць, нарэзаць саломкай. Дадаць пакрышаную цыбулю і яйкамі, заправіць маянэзам і пасыпаць зелянінай.


Ласосевая салата


Трэба: 1 бляшанка кансерваванага ласося, 5 яек, 2 кіслыя яблыкі (антонаўка), 150-200 г сыру, 300-400 г маянэзу, зеляніна.

Адкрыць бляшанку ласося, зьліць вадкасьць. Зварыць яйкі, абабараць аблыкі, вынуць косткі.

Ласося выкласьці на велькую плыткую талерку, дастаць храшчыкі, разьмяць і разьмеркаваць роўным слоем. Паліць маянэзам. Яблыкі пацерці на ласося, зноўку паліць маянэзам. Зьверху дробна пацерці бялкі яек, паліць маянэзам. Дробна пацерці сыр і таксама паліць маянэзам. Зьверху пацерці жаўткі і упрыгожыць зелянінай.

Паставіць у лядоўню каб салата не расьцяклася.


Магрыб


Трэба: вараная ялавічына, сырая морква, грэцкія арэхі, курага, маянэз.

Парэзаць кубікамі мяса, пакрышыць арэхі, падзерці на буйной драчцы моркву, парэзаць курагу (папярэдне можна размачыць). Усё перамяшаць і заправіць маянэзам.

Салата з авакада


Трэба: 1 авакада, 100 г сыру, 1-2 зубкі часныка, маянэз.

Разрэзаць авакада папалам. Лыжкай вынуць мякаць. Сыр пацерці на дробнай драчцы. Выдушыць часнык. Усё перамяшать і заправіць маянэзам. Пасаліць.

Смачна намазваць на абсмажаны хлеб.

Салата з грыбочкамі


Трэба: 4-5 ст. лыжак марынаваных ці салёных грыбоў, а лепей - абсмажаных шампінёнаў, 2-3 яйкі, 1 велькая цыбуліна, маянэз, соль, перац.

Цыбуліну дробна парэзаць і абсмажыць у алеі да залацістага колеру. Яйкі зварыць і дробна парубіць. Грыбы прамыць і парэзаць. Перамяшаць, заправіць маянэзам і папярчыць.

Чырвонае лобіа


Трэба: 0.5 кг. чырвонае фасолі, 1 шкл. грэцкіх арэхаў, 2-3 велькія цыбуліны, 3-4 зубкі часныку, 50 мл. віннага воцату, соль, чырвоны перац, кінза.

Фасолю замачыць на ноч у халоднай вадзе. Заліць чыстай вадой 1:4 і варыць паўтары гадзіны на вельмі маленькім агні (да мяккасьці). Цыбулю нарэзаць пёркамі і пасераваць. Арэхі размалоць, зьмяшаць з сольлю, перцам, сухімі прыпраўкамі.

Адразу як фасоль прыгатавалася, зьліць вадкасьць у іншы рондаль. Адвар зноўку паставіць на агонь і, калі закіпіць, дадаць арэхі са спецыямі. Варыць на маленькім агні, добра памешваючы. Дадаць цыбулю і гатаваць яшчэ 3 хвіліны. Павінна атрымацца кансістэнцыя вадкай сьмятаны.

Заліць фасолю сосам і акуратна перамяшаць. Дадаць воцат, сьвежую зеляніну, часнык.


Фантазійная салата з журавінамі


Трэба: бульба, морква, сыр, яйкі, журавіны, маянэз, соль.

Пакрышыць вараную бульбу і вараную моркву, пацерці на бурачнай драчцы сыр і вараныя яйкі, дадаць журавіны і заправіць маянэзам. Пасаліць.


Пірагі і піражкі

Пірог з капусты


Трэба: паўпачака дражджэй, слоік сьмятаны, 2/3 пачака маргарыну, 3 яйкі, 4 шкл. мукі, невялікі качан капусты, соль.

Цеста:


Даць набрысьнець у цеплыні сумесі 1/2 пачака дражджэй і слоіка сьмятаны.

Растапіць маргарын - 2/3 пачака.

Да трохі астылага маргарыну дадаць 3 яйкі, дрожджы, соль і мукі столькі, каб можна было раскатаць (прыкладна 4 шклянкі).

Паставіць на 40 хв. у лядоўню.


Капуста:


Невялікі качан (калі ёсьць морква, можна дадаць, але лепш ня трэба :)) парэзаць, падсмажыць, а потым - тушыць.

Раскатаць два бліна з цеста, зрабіць з гэтага пірог. Не забыцца на дзірку пасярэдзіне!


Пірог з цыбулі


Трэба: 4 вялікія цыбуліны, 75 г. маргарыну, 5 ст.л. сьмятаны, 50-100 г. сыру, 1 шкл. + 1-2 ст.л. мукі, 2 яйка, алей смажыць, соль.

Цыбуля:

Парэзаць паўколцамі 4 вялікія цыбуліны і смажыць у алеі, калі амаль гатовыя - пасыпаць мукой (1-2 ст.л.). Пасаліць. Можна дадаць якой-небудзь заморскай закрасы для смаку. Смажыць да залацістага колеру.


Цеста:


Маргарын 75 г., сьмятана 3 ст.л., мука 1 шкл.

Маргарын пацерці, дадаць сьмятану й муку, замясіць калабок. Раскатваць ня трэба.


Поліўка:


Зьбіць міксерам 2 яйка й 2 ст.л. сьмятаны.

Пасыпка:


Пацерці 50-100 г. сыру.

Размазаць па форме цеста, каб атрымалася нешта накшталт латушкі, пакласьці туды смажаную цыбулю. Паліць паліўкай, пасыпаць пасыпкай і вегетай. У духоўку на паўгадзіны.




Мясны торт


Трэба:

Цеста: 200 г. мукі, 200 г. тварагу, 200 г. маргарыну, соль.

Начыньне: 500 г. мяснога фаршу, 2 вялікія цыбуліны, 2 зубкі часныку, 2 морквы, 6 ст. л. алею, 1 шкл. булёну (можна з кубіку), соль, чорны перац, кмен.

Яйка каб абмазваць.

Цеста:


З мукі, тварагу і маргарыну прыгатаваць цеста. Паставіць яго на гадзіну ў лядоўню.

Начыньне:


Дробна пакрышыць цыбулю, сьцерці моркву. Разагрэць у глыбокай патэльні алей. Пасэраваць цыбулю з морквай, дадаць мяса і падрумяніць, павялічыўшы агонь. Дадаць скрышаны часнык, спецыі, булён і варыць 5 хв. на сярэднім агні.

Форму для тортаў змазаць маргарынам, пасыпаць мукой. З 2/3 цеста зрабіць латушку вышынёй 3 см. Пакласьці начыньне. З астатняга цеста зрабіць каўбаскі і пакласьці іх наверх начыньня сеткай. Змазаць верх яйкам.

Смажыць 35 хв. у духоўцы пры 220ºС пакуль корачка ня зробіцца цёмна-залацістая.

Есьці з салатай з сырой гародніны.


Піражкі бульбяныя з грыбамі


Трэба:

Цеста: 10 бульбін, 2 жаўткі, 3-4 ст. лыжкі мукі, соль.

Начыньне: 150 г. грыбоў, 2 цыбуліны, 2 ст. лыжкі масла, чорны перац, соль.

Алей каб смажыць.

Цеста:


Бульбу зварыць у мундырах, пачысьціць, растаўчы. Дадаць жаўткі, соль, муку. Добра перамяшаць.

Начыньне:


Абсмажыць дробна парэзаныя грыбы і цыбулю.

Цеста падзяліць на шарыкі, раскатаць кружкамі, у цэнтар пакласьці начыньне, зляпіць піражкі. Абсмажыць з двух бакоў у алеі.


Сырныя кувэрцікі


Трэба: 250 г. тварогу, 220 г. сыру, 250 г. мукі, 250 г. масла, 2 яйкі, соль. Не абавязкова: канцэнтраванае малако, мускатныя арэхі, сок лімона, разынкі.

Цеста:


250 г. нятлустага тварогу, 250 г. мукі, 250 г. масла, каліва солі і мускатных арэхаў. Цеста пакінуць на гадзіну ў лядоўні.

Начыньне:


220 г. сыру, яйка, сок лімона, 100 г. разынак (лепш не дадаваць =)). Сыр пацерці, усё зьмяшаць.

Абмазка:


1 яйка + 1 ст.л. канцэнтраванага малака.

Зрабіць кувэрцікі зь цеста, унутры з начыньнем, абмазаць абмазкай і пячы ў духоўцы.

спісана ў Марынкі

Сачні з тварагом


Трэба: 1 кг. бульбы, 4-5 ст. лыжак мукі, 2 яйкі, 200 г. тварагу, 150 г. масла, соль.

Бульбу зварыць, абабраць, патаўчы. Дадаць муку, 1 яйка, соль, старанна перамяшаць. Сфармаваць плоскія кружкі, на сярэдзіну пакласьці начынку з тварагу, змешанага з яйкам, краі зашчыпаць. Сачні ўкачаць у муку і абсмажыць з абодвух бакоў на масьле.

Падаць гарачымі з маслам або смятанай.

Проста ежа

Дранікі


Трэба: 10 бульбін, яйка, 2 ст. лыжкі алею, 2,5 ст. лыжкі мукі, сода, соль.

Абабраць і падраць бульбу, дадаць яйка, муку, соду, соль. Усе перамяшаць, уліць алею.

Смажыць. Есьці =).

Некаторыя дадаюць яшчэ кефір (паўшклянкі прыкладна).

Каб бульба меней акісьлялася, можна спачатку садраць на драчцы цыбуліну.

Зацірка


Трэба: 1,5 шкл. мукі, 1-2 яйкі, 40 г. сметанковага масла, 6-7 шкл. малака, соль.

Прасеяную пшанічную муку падсмажыць на патэльні без масла да светла-карычневага колеру, дадаць трошкі вады, яйка, масла, соль, старанна перацерці. Атрыманыя камячкі цеста засыпаць у рондаль з гатаваным малаком. Варыць 5-7 хвілін на невялікім агні памешваючы. Калі трэба, дадаць соль.


Запяканка з бульбы і яек


Трэба: 800 г бульбы, 4 яйкі, 50 г. сыру, 0,25 шклянкі малака, 60 г. тлушчу, соль, перац, зеляніна.

Бульбу зварыць, абабраць, парэзаць кружкамі, абсмажыць на тлушчы, выкласьці на патэльню, змазаную тлушчам. Зьмяшаць яйкі, малако, змельчаны на тарцы сыр, соль, перац, пасечаную зеляніну пятрушкі або кропу, заліць бульбу і паставіць у духоўку на 7-10 хвілін.

Падаць са сьвежымі агуркамі або памідорамі.

Галубцы


Трэба: 500 г. фаршу (сьвініна + ялавічына, можна дадаць сала), 700 г. сьвежай капусты, 1 цыбуліна, 2/3 шклянкі рысу, 2 шкляшкі соса (сьмятана, таматная паста), соль, прыпраўкі, зеляніна.

Качан капусты зварыць ў падсоленай вадзе, крыху асьцюдзіць, разабраць на асобныя лісьцікі і выразаць тоўстыя ножкі. Магчыма сярэдзіну прыйдзецца даварыць.

У фарш дадаць цыбулю, амаль згатаваны рыс, пасаліць, заправіць перцам ці яшчэ чым. Загарнуць фарш у лісьця капусты. Можна абсмажыць галубцы на патэльні, калі зьявіцца корачка – заліць сьмятанным сосам і тушыць. Можна адразу тушыць з морквай і сьмятанай. Можна на дно патэльні пакласьці лісьце капусты, на іх – галубцы і тушыць.

Сырнікі


Трэба: 250 г. тварагу, 1 яйка, соль, цукар, 2 ст. лыжкі мукі, алей каб смажыць.

Тварог зьмяшаць зь яйкам, дадаць соль, цукар, перамяшаць, дадаць муку. Замясіць цеста, зьляпіць шарыкі, абваляць іх у муцэ і расплюшчаць. Смашыць на сярэднім агні.


Рыба ў белым сосе


Трэба: палтус: 2 порцыі, 1 пакецік вяршкоў, 1 пакецік яблычнага соку, шампіньёны.

Заліць рыбу на патэльні яблычныч сокам і паварыць у ім каля 5 хв. пасьля як закіпіць.

Адначасова на іншай патэльні падсмажыць грыбы. Выкласьці рыбу ў патэльню з грыбамі і заліць вяршкамі. Пасаліць, дадаць спецыі. Тушыць на маленькім агні 10-15 хв. Падаваць з грыбамі і сосам.

Цеста для піцы


Трэба: 1/2 пачака маргарыну, 25 г. дражджэй, 1/2 шкл. малака, 3-4 ст. л. цукру, 3/2 шкл. мукі, соль.

Дрожджы засыпаць цукрам і развесьці цёплым малаком, пачакаць. Маргарын пацерці, дадаць соль, муку і расьцерці ў аднародную масу. Дадаць дрожджы. Усё перамяшаць. Цёста хапае на адну бляху сярэдніх памераў.


Плоў


Трэба: 500 г. ялавічыны, 500 г. рысу, 1 цыбуліна, 3 морквы (можна болей), 1 часнык, 200 г. алея, соль, перац, шафран, кумін, чылі.

У рондаль (ці казан), наліць 200 г. алея. Калі алей добра нагрэецца - пакласьці ў яго парэзанае кавалкамі мяса. Пасаліць, папярчыць і смажыць да залацістага колеру. Дадаць пакрышаныя саломкай цыбулю і моркву, потым рыс. Перамешваць ня трэба, толькі прытаптаць рыс. Пакласьці колам у рыс нячышчаныя зубочкі часныку. Заліць кіпнем, прыправіць чылі, шафранам, кумінам і на вялікім агні без накрыўкі выпарыць ваду каб яна была на 2 пальцы вышэй ад ўзроўня рысу. Зьменшыць агонь, накрыць рондаль і варыць пакуль не прыгатуецца рыс.


Капусткіны кветкі з сырам


Трэба: квяцістая капуста, маянэз, сыр, крыху мукі, алей, прыпраўкі, соль.

Зварыць у салёнай вадзе акуратна разабраныя капусткіны кветкі. Потым вынуць іх з вады, абваляць у муцэ, прыправіць і абсмажыць. У рондаль наліць крыху вады з-пад капусты, дадаць некалькі лыжак маянэзу, шчыльненька пакласьці абсмажаныя капусткіны кветкі, паліць зверху маянэзам і багата пасыпаць сырам. Накрыць і тушыць на маленькім агні пакуль не расплавіцца сыр.


Катлеты з бульбы і капусты


Трэба: 300 г. бульбы, 300 г. капусты, 1/4 шкл. мукі, 1 цыбуліна, 2 лыжкі паніроўкі, алей, прыпраўкі, соль.

Капусту пашынкаваць і пасмажыць, пасераваць цыбулю. Зварыць бульбу ў мундыры. З усяго атрыманага зрабіць фарш, дадаць муку, соль, зьляпіць катлеткі, абваляць іх ў паніроўцы і смажыць.


Мачанка па-сялянску


Трэба: 250 г. сьвініны з рэбернымі косткамі, 250 г сырой каўбасы, 2 цыбуліны, 100 г. сала, 2 ст. лыжкі мукі, соль, лаўровы ліст.

Кавалкі сьвініны і сырой сялянскай каўбасы абсмажыць. Пшанічную або ячную муку развесьці халоднай вадой і ўліваць у кіпень, увесь час памешваючы, да ўтварэння рэдкай мучной падліўкі. Дадаць соль, лаўровы ліст, пакласьці кавалачкі падскваранага разам з цыбуляй сала, а таксама сьвініну і каўбасу. Паставіць на 20-25 хвілін у духоўку.

Да мачанкі падаць бліны або вараную бульбу.

Бабка з грыбамі


Трэба: 1,2 кг бульбы, 60 г сушаных грыбоў, 2 цыбуліны, 1 ст. лыжка мукі, 1 ст. лыжка маргарыну, 50 г сала, 3 ст. лыжкі смятаны, соль.

Загадзя замочаныя грыбы зварыць, нарэзаць саломкай, абсмажыць на сале, дадаць смятану, соль, патушыць 5-10 хвілін.

Бульбу абабраць, надраць на тарцы, дадаць растоплены маргарын, грыбы з цыбуляй, перамяшаць. Падрыхтаваную масу выкласці ў гліняны гаршчок (чыгунок), змазаны тлушчам, і запякчы ў духоўцы.

Спагеці карбанара


Трэба: 2 ст л аліўкавага алею, 175 г дробна пакрышанага бэкона, 25 г масла, 2 жаўткі, 2 яйкі, 8 ст л цёртага сыру (пармезану), 350 г спагеці.

Разагрэць алей на патэльні, абсмажыць бэкон 5 хв на сярэднім агні. Дадаць масла, перамяшаць.

У латушцы зьмяшаць жаўткі, яйкі і цёрты сыр. Дадаць прыпраўкі. Зварыць спагеці ў салёнай вадзе. Ваду сьліць. Дадаць сумесь бэкона і сыру, перамяшаць, пакуль усе спагеці ня будуць пакрытыя сосам.

Замест бэкона можна дадаць кавалкі вэнджанай рыбы (ласося) альбо вараныя крэветкі. Можна таксама зрабіць вегетарыянскі варыянт замяніўшы бэкон на грыбы.


Рыба па-манастырску


Трэба:


Стравы зь мяса

Курыныя кумпячкі ў сосе


Трэба: 3 курыныя кумпячкі, велькая цыбуліна.

Сос: булён, 2 шклянкі сьветлага піва, 2 ст. лыжкі мукі, 1 ст. лыжка воцату, 3 ст. лыжкі таматнага сосу, пятрушка, соль, чорны молаты перац – на смак.

Курыныя кумпячкі пасаліць, паперчыць і абсмажыць у гарачым алеі з усіх бакоў. Цыбулю дробна пакрышыць і дадаць да кумпячкоў. Зьменшыць агонь, пасыпаць мукой, уліць крыху булёну і траціну піва. Паварыць некалькі хвілін і перакласьці курыцу і цыбулю ў іншы посуд.

Сос: у патэльню дзе смажыліся кумпячкі, уліць воцат, рэшту піва, таматную пасту. Сумесь крыху пакіпяціць, дадаць зеляніну, соль, перац.

Смазаць алеем форму для запяканьня, пакласьці ў яе мяса і цубулю, заліць сосам, накрыць фальгой і тушыць ў папярэдне прагрэтай да 180ºС духоўцы каля 30 хвілін.

Калі мяса амаль гатовае, здыміце фальгу і пакіньце кумпячкі на некалькі хвілінак адкрытымі.

Курыца на бутэльцы


Курыцу (невялікую) абмыць, нацерці сольлю, перцам, унутры таксама пасаліць-папярчыць. Наліць трэць піўной бутэлькі вады (можна папалам з півам ці віном), дадаць галоўку часныка. Пасадзіць курыцу на бутэльку, пашпігаваць ці абцерці часныкам. Бутэльку паставіць у духоўку (ў паддоне, каб сок сьцякаў) на 45 хв – 1 г. 15 хв. Ні паліваць, ні круціць курыцу неабавязкова. Вынімаць калі скурка зробіцца прыгожая і румяная.

Дадатак: на бляху ля курыцы можна пакласьці бульбу, парэзаную вялікімі кавалкамі (на 2 – 4 часткі). Саліць ня трэба. Сок ад курыцы будзе капаць на бульбу. Смачна і зручна.


Мяска па-албанску


Трэба: 100-150 г. мяса (смачна курынага), 1 цыбуліна, 1 яйка, мука, алей каб смажыць, прыпраўкі, соль.

Парэзаць мяса маленькімі кубікамі, дадаць дробна парэзаную цыбулю, яйка, мукі столькі, каб не расьцякалася цеста. Пасаліць, прыправіць. Смажыць як бліны.

спісана ў Камілкі

Сьвініна з плаўленым сырам


Трэба: 800 г нятлустай сьвініны, 200 г плаўленых сыркоў, 1 шкл малака.

Нарэзаную і крыху адбітую сьвініну пакласбці ў абмазаны алеем рондаль і заліць малаком. Паставіць у распаленую духоўку (150°С). Праз гадзіну дадаць нарэзаны тонкімі скрылёчкамі плаўлены сыр і запячы.


Ялавічына зь вяршкамі


Трэба: ялавічына, цыбуля, грыбы, памідоры, вяршкі, алей каб смажыць, соль.

Мяса нарэзаць кавалкамі, адбіць, абсмажыць у алеі і пакласьці ў рондаль. У гэтым жа алеі абсмажыць цыбулю і грыбы, пакласьці іх на мяса, зьверху – памідоры кавалкамі. Усё заліць вяршкамі і тушыць на маленькім агні.

Смачна з грэчкай.

Ялавічына па-фламандзку


Трэба: 800 г ялавічыны, 1 цыбуліна, 2 зубкі часныку, 6-7 лаўровых лісткоў, перац гарошкам, 300 г цёмнага піва, 1 скрылёк хлеба, 1 ст лыжка цукру, 1 лыжачка гарчыцы, соль і молаты перац.

Мяса нарэзаць, пакласьці ў рондаль, наліць крыху вады. Крыху абсмажыць нашынкаваную цыбуліну, дадаць да мяса. Пакласьці ў рондаль разьмятыя зубочкі часныку, лаўровае лісьце і перац гарожкам, а потым заліць півам і тушыць.

За 20 хв да канца тушаньня, калі мяса амаль згатавалася, пакласьці ў рондаль добра намазаны гарчыцай скрылёк хлеба без скарынкі і дадаць цукар. Тушыць пакуль хлеб не разыйдзецца ў сосе. У самым канцы дадаць соль, перац і прыправы.

Супы і сосы

Булён курыны з клёцкамі


Трэба: 500 г курынага мяса, 1 морква, 1 цыбуліна, 1 яйка, 0,75 шклянкі мукі, 1 м. лыжка сметанковага масла, соль, лаўровы ліст, зеляніна.

Булён


Падрыхтаванае курынае мяса заліць халоднай вадой. Калі яна закіпіць, зьняць пенку, пакласьці моркву і цыбуліну, варыць на слабым агні да гатоўнасьці мяса, у канцы прыгатаваньня дадаць соль, лаўровы ліст. Булён працадзіць.

Клёцкі


Муку, яйка, соль, масла, каля чвэрці шклянкі ахалоджанага булёну старанна перамяшаць. З атрыманага цеста аддзяляць лыжкай невялікія клёцкі і апускаць іх у булён, варыць 5 хвілін.

Падаць з кавалачкамі курынага мяса, пасыпаўшы змельчанай зелянінаю (кроп, пятрушка).


Французскі цыбулевы суп з крутонамі


Трэба:

Суп: 1 кг. цыбулі, 2 долькі часныку, 300 мл. сухога віна, 40 г. масла, 2 ст. лыжкі алею (пажадана аліўкавага), 3 булённых кубіка, 1 ст. лыжка цукра, соль.

Крутоны: 8 тоўстых кавалкаў французскага батона, 100 г. цёртага цьвёрдага сыру.

Растапіць масла ў рондалі, дадаць дробна парэзаную цыбулю, цукар, соль і абсмажыць да залацістага колеру. Зьменшыць агонь, дадаць пакрышаны часнык і смажыць яшчэ каля 20 хвілін да карычневага колеру.

Дадаць віно, разьмяшаць. Потым даліць 1.3 літры вады і пакрышыць булённыя кубікі.

Падсмажыць хлеб з абодвух бакоў, Разьліць суп на асобныя порцыі, зьверху пакласьці хлеб, пасыпаць сырам. Растапіць сыр у духоўцы альбо печцы.


Ласункі

Яблычная казка


Трэба: 500 г. яблык (абабраных і парэзаных кавалкамі), 150 г. цукру + яшчэ каб пасыпаць, 4 ст. лыжкі масла, 4 ст. лыжкі мукі, 100 г. малака, 4 ст. лыжкі гарэхаў, цынамон.

Яблыкі:


Яблыкі засыпаць цукрам на 20 хвілін. Растапіць у рондалі масла і пасэраваць у ім.

Поліўка:


Разьвесьці муку малаком, каб атрымалася густая белая поліўка (паварыць некалькі хвілін па прынцыпу заварнога крэму). Дадаць гарэхі (ці што іншае смачнае :)), жаўткі і зьбітыя бялкі. Можна поліўку таксама пасаладзіць.

На бляху пакласьці слой яблыкаў, заліць падрыхтаванае поліўкай, пасыпаць цукрам з цынамонам і пячы ў духоўцы 20-25 хвілін.


Яблычны штрудэль


Трэба: 150 г. маргарыну ці масла, 3 яйкі, цукар, 200 г. сьмятаны, разрыхляльнік цеста ці дрожджы, мука, яблыкі, цынамон, ваніль…

Цеста:


Растапіць 150 г. маргарыну ці масла. Дадаць 3 яйкі, 2-3 ст.л. цукру, 200 г. сьмятяны, разрыхляльнік цеста (ці паўпачака дражджэй). Мукі столькі, каб не ліпла да пальцаў. Пакінуць у цеплым мейсцы ці лядоўні.

Яблыкі:


Абабраныя яблыкі пацерці на бурачнае драчцы, дадаць цукру каб салодка. Адзін яблык парэзаць кавалачкамі. Можна дадаць цынамон, ваніль, разынкі ці яшчэ што-небудзь.

Зрабіць штрудэль (доўгі напаўзакрыты пірог) і пячы ў духоўцы.


Яблычны пірог


Трэба: 4-6 яблыкаў, 2 яйкі, паўшклянкі цукру, паўшклянкі малака, 30 г. маргарыну ці масла, 1 шкл. (ці крыху болей) мукі, чвэрць пачака дражджэй, цынамон, ваніль.

Цеста:


Зьбіць яйкі з цукрам, дадаць цёплае малако і растоплены маргарын (ці масла). Дадаваць муку пакуль цеста не зробіцца падобным да добрай сьмятаны. Дадаць дрожджы і пакінуць цеста набрысьнець.

Яблыкі:


Яблыкі абабраць і парэзаць не надта тоўстымі скрылёчкамі.

2/3 цеста заліць у змазаную алеем форму, наверх пакласьці слой яблыкаў, пасыпаць цынамонам і ванільлю. Паверх яблыкаў размазаць тонкім слоем пакінутае цеста. Трэба каб яблыкі не тырчалі зь пірага, бо йнакш могуць падрагэць. Паставіць ў гарачую духоўку і пячы покуль не зьявіцца прыгожая скарынка.


Французскія палачкі


Трэба: 200 г. тварагу, 50 г. масла, 100 г. вады, 6-7 ст.л. мукі, 1 м.л. цукру, соль, сода (1/2 м.л.).

Тварог расьцерці з сольлю й цукрам. Дадаць масла, ваду, соду, муку, Цеста павінна атрымацца дастаткова пругкім, каб ляпіць. З маленькіх кавалачкаў скатаць каўбаскі і пакласьці на пасыпаную мукою бляху. Паставіць у прагрэтую духоўку і пячы да жадаемага колеру. Духоўку падчас выпяканьня не адчыняць!


Мядовы корж


Трэба: 3 яйкі, 1 шкл. цукру, паўслоіка сьмятаны, 1 м.л. соды, 1 шкл. штучнага мёду, 3 шкл. мукі.

Усё зьмяшаць і ў духоўку.


Заварны пуш


Трэба: 500 г. малака, 200 г. цукру, 100 г. мукі, 4 яйкі, 1 г. ванілі.

У малако пакласьці цукар, спарыць.

Муку пагрэць у духоўцы да сьветла-залатога колеру, разьбіць у яе яйкі, мяшаць пакуль ня зьнікнуць камячыкі. Калі маса атрымоўваецца надта густая – даліць малако.

У атрыманую сумесь уліць, памешваючы, спаранае малако з цукрам. Паставіць на маленькі агонь і ўвесь час мяшаць – пакуль не загусьцее. Дадаць ванілін. Зьняць з пліты.


Печыва зь півам


Трэба: 2 пачака маргарыну, 1 шкл. сьветлага піва, 5-6 шкл. мукі, цукр на пасыпку.

Маргарын растапіць, калі трохі астыне – дадаць піва, муку, замяшаць цеста. Пакласьці яго ў халадзільню на 4-5 гадзін (альбо на 1 гадзіну ў маразільню). Потым раскатаць цеста таўшчынёй 1 см, пасыпаць цукрам, парэзаць на кавалачкі, раскласьці на блясе і пякчы ў гарачай духоўцы. Печыва павінна зрабіцца ў 2-3 разы вышэйшым.


Маміна шарлотка


Трэба: яблыкі, 3 яйкі (на сярэднюю форму), 1 шкл. цукру, 1 шкл. мукі і алей смажыць.

Яблыкі абабраць, парэзаць долькамі і пакласьці нятоўстым слоем у змазаную алеем форму. Добра зьбіць міксэрам яйкі з цукрам, дадаць муку і працягваць зьбіваць покуль не атрымаецца аднародная маса. Выліць яе на яблыкі і паставіць форму ў гарачую духоўку. Пякчы пакуль не зьявіцца сьветла-карычневая скарынка.


Медавуха


Трэба: 1 л. вады, 300 г. мёду, 1/4 лыжачкі дpажджей, зёлкі.

Згатаваць ваду, крыху асьцюдзіць, разьвесьці ў ёй мёд. Асьцюдзіць, дадаць разьведзеныя цёплай вадой дpожджы. Для водару можна дадаць розных зёлак. Паставіць у цёплае месца на 3-4 дні ці ў прахладнае 6-8 дзён. Працадзіць.


Зёлкі

Арэгана


Арэгана шырока выкарыстоўваецца ў грэцкай і італійскай кухні. Надае адмысловы смак піцы, запяканкам, сосам з памідораў. Арэгана таксама дадаюць у гарачыя бутэрброды, супы і мясныя стравы.

Базілік


Лісьце базіліку багатае эфірным маслам, каратынам і рутынам.

Базілік падыходзіць да яечных, зялёных, крабавых салатаў, але не да бульбавых і бабовых. У яечныя, макаронныя стравы, да сыру, варанае ці заліўнае рыбы, тушанага мяса базілік дадаюць не раней чым за 10 хв да гатоўнасьці.


Гвазьдзікі


Выкарыстоўваюцца гвазьдзікі ў асноўным разам з цынамонам пры гатаваньні трункаў з віном, пуншаў, фруктовых сокаў і кампотаў. Гвазьдзікі дадаюць у размаістыя марынады, стравы з капусты і бараніны, цёмныя мясныя поліўкі і салодкія сосы.

Імберац


Імберац добра спалучаецца з іншымі прыправамі, уваходзіць у склад многіх сумесяў. Зь імберацам гатуюць сосы, дадаюць яго як прыправу ў супы, курыныя і рыбныя булёны, стравы з мяса і птушкі. Яго таксама дадаюць у марынады, хлебабулачныя вырабы, кампоты, гарбаты і мядовыя напоі.

Кардамон


Кардамон надае асаблівы смак салодкім пірагам, пернікам і фруктовым десертам. Кардамон - выкшталцоўная зёлка. Яна ўваходзіць у склад знакамітых лікёраў, яе дадаюць у каву, настойкі, рыбныя стравы. У Заходняй Эўропе кардамон дадаюць у гарохавыя супы і бульбяныя салаты. Невялікая колькасьць кардамона ў спалучэньні з мускатным арэхам добра падыходзіць для соса для варанае рыбы.

Кары


Кары - адна з самых распаўсюджаных у сьвеце перных сумесяў. Асновай кары зьяўляецца куркума. Часьцей за ўсё кары выкарыстоўваецца для страваў з рысу і гародніны, а таксама птушкі.

Карыяндар


Насеньне карыяндару выкарыстоўваецца ў выпечцы, дадаецца пры тушэньні мяса, марынаваньні рыбы, засолцы капусты. Перад ужываньнем насеньне карыяндара трэба растаўчы.

Кроп


Кроп ужываюць для прыгатаваньня салатаў, супоў, мясных страваў. У велькіх колькасьцях кроп прымяняюць для смажаньня рыбы

Куркума


Куркума паляпшае апетыт, садзейнічае пераварваньню ежы.

Куркумой араматызуюць сосы, амлеты, салаты, стравы з ялавічыны, курыцы, бараніны, макаронаў, марынады для рыбы і гародніны.

Куркуму дадаюць ў невялікіх колькасьцях (1/4 лыжачкі на 4 порцыі), інакш смак будзе надта рэзкі.

Маяранак


Маяранак выдатна спалучаецца з часныкам; яго выкарыстоўваюць для бульбяных, грыбных, гарохавых супоў, сосаў, паштэтаў, страваў зь ялавічыны. Маяранак робіць смак мяса больш пяшчотным, таму яго дадаюць ў фаршы для катлет, рулетаў і г.д. Яго таксама ўжываюць для таматных і сьмятянных сосаў, страваў зь яек.

Мускатны арэх


Традыцыйна мускатны арэх дадавалі ў шакалятавыя вырабы і дэсерты. У заходнеэўрапейскай кухні ўжываецца для араматызаваньня гародніны (бульбы, супоў, салатаў). Найлепей ўжываць мускатны арэх у стравах дзе мяса альбо рыба спалучаюцца з гароднінай ці грыбамі, а таксама ў сосах.

Перац чылі


Добра спалучаецца з мяснымі, бабовымі, рысавымі стравамі, стравамі з гародніны. Надае пякучасць.

Пятрушка


Традыцыйна пятрушкай араматызуюць супы. Сьвежая пятрушка дадаецца ў салаты.

Размарын


Размарын выкарыстоўваюць замест лаўровага ліста для супоў, для смажанай рыбы, як прыправу для сосаў, кветкавай капусты, макаронаў, дадаюць у піцу.

Невялікую колькасьць размарын расьціраюць зь пятрушкай і маслам у пасту, якую закладваюць пад скуру птушкі перад тым як смажыць ці тушыць.


Фенхель


Насеньне фенхелю выкарыстоўваюць для супоў, а таксама для страваў з рыбы і сьвініны, для сосаў і марынадаў.

Хмелі-сунэлі


Гэта папулярная на Каўказе сумесь зёлак, дастаткова вострая і араматная. Выкарыстоўваецца для блюд грузінскае кухні - харчо, сацыві, а таксама для страваў зь мяса.

Цынамон


Цынамон ўжываецца пры гаваньні салодкіх прысмакаў, рулетаў, пірагоў, запяканак. Добра спалучаеца зь яблыкамі. Цынамон дадаюць ў гарачае віно, грогі, пуншы, лікёры.

Цынамон у невялікіх колькасьцях дадаюць ў гусіны фарш. На ўсходзе цынамонам прыпраўляюць стравы з бараніны. Ён паляпшае смак тлустага мяса.

Цынамон дадаюць за 7-10 хв да гатоўнасьці.

Часнык


Часнык выкарыстоўваецца для любых ставаў, акрамя рыбных.

У супы і другія стравы часнык дадаюць за некалькі хвілін да выключэньня агня, альбо адразу пасьля выключэньня і даць страве пастаяць яшчэ нейкі час. Ня варта моцна і доўга грэць часнык, але калі дадаць яго ва ўжо астылую страву перад тым як паставіць на стол, то часнык забье іншыя араматы і зробіць смак надта простым і невыкшталцоўным.


Шафран


На ўсходзе шафран дадаюць у стравы з рысу і празрыстыя супы. Яго таксама выкарыстоўваюць пры прыгатаваньні бараніны і кветкавай капусты, у курыных, мясных, баклажанавых і фасолевых стравах, кандытарскіх вырабах.

Шафран дрэнна спалучаецца зь іншымі прыпраўкамі і звычайна выкарыстоўваецца асобна ў выглядзе сьпіртовых настоек.


Наша Страва ©NN

Бігас з грыбамі


Кіслая капуста — 500 г, сьвежая капуста — 500 г, сьвініна — 200 г, хатняя кілбаса — 200 г., вэнджаніна — 100 г, тамат-пюрэ альбо кетчуп — 60—80 г, сушаныя грыбы — 20 г, цыбуля — 40 г, цукар — 20 г, шпік, перац чорны, соль.

Сушаныя грыбы прамыць цёплай вадой, пакласьці ў посуд, заліць халоднай вадой і пакінуць на дзьве гадзіны. Затым адварыць, даць астыць і парэзаць на дробныя кавалкі. Кіслую капусту дробна пасекчы і тушыць у невялікай колькасьці вады. Сьвежую капусту парэзаць квадрацікамі, паставіць у духоўку і прагрэць да мяккасьці, пасаліць, папярчыць і зьмяшаць з кіслай капустай. Затым дадаць смажаны шпік, сьвініну, кілбасу, вэнджаніну, пасіраваную разам з тамат-пюрэ (альбо кетчупам) цыбулю, грыбы, цукар, перац, соль. Усё перамяшаць і паставіць тушыць на слабым агні да гатоўнасьці.

Для лепшага смаку можна дадаць чырвонае сухое віно, чарнасьліў, кмен, маяран.

Бігас зь яблыкамі


Ялавічына — 250 г, сьвініна — 250 г, шынка — 150 г, хатняя кілбаса (па жаданьні) — 150 г., маргарын — дзьве сталовыя лыжкі, капуста кіслая — 1 кг, цыбуля — 1 рэпка, яблыкі — 2—3 шт., булён — 1 шклянка, перац чорны, соль.

Мяса парэзаць, пасаліць, папярчыць; маргарын разагрэць. Выкласьці прадукты ў наступным парадку: мяса, парэзаная шынка, кілбаса, капуста, парэзаная цыбуля, яблыкі, ачышчаныя і парэзаныя на скрылькі. Заліць булёнам і тушыць да гатоўнасьці.

Пры падачы на стол пасыпаць зелянінай.

Слоенае цеста на кулябякі


Асноўныя складнікі цеста — мука і масла ў суадносінах 1:1, дадатковыя складнікі — яйкі ці яечны жаўток, лімонны сок ці вінны воцат, якія перашкаджаюць тлушчу пранікаць у цеста, ці раздробнены кіслы тварог.

Найперш належыць замяшаць цягучае цеста, як на пірагі, з дабаўленьнем яйка, лімоннага соку ці тварагу. Раскачаць яго на пасыпанай мукой дошцы, абшмараваць маслам, скласьці напалам, зноў раскачаць, зноў абмасьліць і зноў скласьці; так рабіць да таго, пакуль масла цалкам не ўкачаецца ў цеста. Пры раскочваньні на качалку трэба націскаць лёгка і раўнамерна, захоўваючы адзін напрамак — ад сябе вонкі. Нельга таксама цеста пераварочваць, каб не пашкодзіць яго структуры. Францускае цеста запякаецца пры высокай — 250°C — тэмпэратуры 15—30 хвілін, прычым прыблізна праз 10 хвілін запяканьня, калі цеста паднімецца, тэмпэратуру належыць зьменшыць.

Заўвага: слоенае цеста вельмі працаёмкае, але большасьць традыцыйных «ліцьвінскіх» кулябяк можна пячы і з дражджавога цеста.

Кулябяка па-сапегаўску


Начынка: 400 г квашанай капусты, 30 г сушаных грыбоў, 100 г вэнджанай шынкі ці грудзінкі, 1—2 цыбуліны, 1,5 лыжкі тлушчу, яйка для шмараваньня, соль і перац на смак.

Грыбы памыць, вымачыць і згатаваць. Капусту пашынкаваць, заліць грыбным адварам, даць пакіпець, не накрываючы. Цыбулю абабраць, парэзаць і падсмажыць, перамяшаць з капустай, нарэзанымі грыбамі і пакроенай на палоскі шынкай, заправіць прыправамі. Цеста падзяліць на дзьве часткі: адну меншую, другую большую. Сфармаваць зь іх прастакутнікі таўшчынёй 1 см. На меншы прастакутнік цеста выкласьці слаямі начынку, не забываючы пакінуць вакол кант шырынёй 1—2 см. Затым накрыць усё вялікім кавалкам цеста, зьляпіць берагі, пашмараваць узьбітым яйкам і запячы ў гарачай духоўцы.


Кулябяка па-радзівілаўску


Начынка: 300 г смажанай кураціны без касьцей, два яйкі, звараныя ўкрутую, 150 г вэнджанай шынкі, бацьвіньне пятрушкі, соль і перац на смак, сырое яйка для шмараваньня.

Мяса, шынку і вараныя яйкі нарэзаць кубікамі, перамяшаць з пашынкаваным бацьвіньнем пятрушкі, дадаць соль і перац. Далей гатаваць, як у папярэднім рэцэпце.


Цеста на калдуны


2 шклянкі мукі, гатаваная вада, яйка, соль.

Старанна замяшаць цеста і тонка раскачаць.

Фарш можна рабіць з чаго хочаш. Калісьці самымі папулярнымі былі тварожныя фаршы, але былі і мясныя, і рыбныя, і нават фруктовыя — з сушаных вішань, сьліў або чарніц. Так што калдуны могуць быць і цяжкай, асноўнай стравай, а могуць і дэсэртам. Да тварагу дадавалі эстрагон, а калі начынялі белым сырам, дык да яго дадавалі ў роўнай долі насыпка звараную грэчку.

Фарш мусіць быць ані занадта цьвёрды, ані занадта глейкі — найлепш, калі ўдаецца сфармаваць зь яго невялікія «галкі». Не павінен трапляць паміж зьлепленымі краямі цеста, каб потым калдуны не расклеіліся. Мяса на праўдзівыя калдуны нельга прапускаць праз машынку. Гэта найгоршае, што можна зрабіць!!! Толькі сячы нажом, рэкамэндуюць старыя кнігі. Варыць найлепш у пляскатым шырокім рандэлку, на малым агні, у вялікай колькасьці добра пасоленай вады, каля пяці хвілін ад моманту ўсплываньня на паверхню. Але некаторыя гатункі калдуноў лепей смажыць. Напрыклад, «палескія» (фарш: на 500 г варанай рыбы 3 філе селядца, 2 яйкі накрута, дзьве лыжкі пятрушкі і адзін жаўток) найлепш смажыць у фрыцюры.


Цеста ліцьвінскае


400 г мукі, 3—4 лыжкі соку цыбулі, 2 яйкі, 2 сырыя жаўткі, соль (на 4 порцыі, прыгатаваньне — 10 хвілін).

Прасеяць муку, зрабіць паглыбленьне, убіць туды яйкі і жаўткі, уліць сок цыбулі і старанна замяшаць цеста (не дадаючы вады!). Накрыць накрыўкай, пакінуць, каб адпачыла (каля 30 хвілін). На пасыпанай мукой дошцы раскачаць цеста, выкраіць круглыя кавалкі, напоўніць згатаваным фаршам, склеіць. Гатаваць партыямі ў падсоленым кіпні.


Фарш віленскі грыбны


150 г сушаных грыбоў, 1—2 лыжкі цёртай булкі, 200 г вэнджанай шынкі, яйка, 1—2 цыбуліны, лыжка масла, соль, перац (на 4 порцыі, прыгатаваньне — 30—40 хвілін).

Памытыя грыбы вымачыць у невялікай колькасьці вады, згатаваць, адцадзіць і разам з шынкай прапусьціць празь мясарубку. Парэзаную цыбулю падсмажыць у растопленым масьле, зьмяшаць з грыбамі і шынкай, дабавіць солі і перцу на смак, убіць яйка, дабавіць цёртай булкі, сфармаваць масу. Пасьля прыгатаваньня калдуноў падаваць іх, паліўшы растопленым маслам ці лоем. Падобны фарш таксама шырока ўжываецца ў лазанках.


Тышкевічаўскія калдуны


Соль, перац, 2 лыжкі масла, 140 г сушаных грыбоў, 2 цыбуліны, 200 г тлустай вэнджанай шынкі, 2 яйкі, звараныя ўкрутую, і адно сырое.

Памытыя і вымачаныя грыбы згатаваць. Парэзаную цыбулю падсмажыць на масьле, дабавіць парэзаныя грыбы, крыху пасмажыць разам, перамешваючы, астудзіць. Дабавіць пакрышаныя вараныя яйкі і шынку, заправіць на смак сольлю і перцам, старанна перамяшаць, дадаўшы сырое яйка. Вылепіць маленькія піражкі, варыць каля пяці хвілін на малым агні.


Зразы па-наску


600—700 г мяккае ялавічыны, алей, 100—150 г сычужнага сыру, 100 г вэнджанага тлустага кумпяка, 25—30 г пятрушкі, 15—20 г кропу, каліва ядлаўцовых ягад, грэчка.

Для поліўкі: прыкладна 300 г абсмажаных на алеі таматаў з дадаткам масла, 200 г сьвежых грыбоў, лыжку таматнае пасты, каліва ядлаўцовых ягад, кмен.

Мяса пакраіць танюткімі скрылёчкамі, зьлёгку абабіць й спрыснуць лімонным сокам з халоднай вадою, дадаць меленага ядлоўцу, даць пастаяць.

Падрыхтаваць начынку: сыр нацерці на буйной тарцы, кумпяк пакраіць танютка саломкаю, зяленіва дробна пасекчы. Дадаць тоўчаны ядловец, духмяны перац і крыху перцу чылі. Усё перамяшаць, патаўчы.

На поліўку: згатаваць амаль да канца грыбы, танютка парэзаўшы, абсмажыць у алеі з маслам. Туды ўкінуць таматную масу, тоўчаны ядловец. Дадаючы грыбнога адвару, тушыць да ўтварэньня аднароднай масы.

Асобна згатаваць грэцкую кашу: 12—13 хвілін варыць, столькі ж трымаць у шчыльна закрытай пасудзіне.

На падрыхтаваныя папярэдне скрылёчкі мяса выкласьці начынку, згарнуць у выглядзе каўбасак, зьвязаць ніткамі. Каўбаскі крышку падсаліць, зважаючы на саланаватасьць іншых інгрэдыентаў, папярчыць і крышку абсмажыць на вялікім агні з абодвух бакоў. У гаршчочак ці чыгунок на дно пакласьці тонкія скрылёчкі кумпяка, на іх — падсмажаныя зразы (ужо бязь нітак), зьверху засыпаць грэцкай кашаю. Усё заліць поліўкаю, засыпаць тоўчаным кменам, шчыльна накрыць накрыўкай і тушыць 30—35 хвілін.


Зразы з бульбы


1 кг бульбы, 300 г ялавічыны, 120 г сала, 2 цыбуліны, соль, перац.

Палову бульбы абабраць, надраць на тарцы. Рэшту бульбы зварыць у лупінах, абабраць, прапусціць празь мясарубку, перамяшаць з сырой цёртай бульбай, пасаліць. Ялавічыну адварыць, прапусьціць празь мясарубку, зьмяшаць з падсмажанай цыбуляй, перцам і сольлю.

З бульбяной масы сфармаваць плоскія кружкі, пакласьці на сярэдзіну фарш, краі зашчыпаць, надаўшы зразам авальную форму. Абсмажыць з усіх бакоў на сале.

Верашчака з салам і сэльдэрэем


200 г сала, 2—3 сталовыя лыжкі пшанічнай ці ячнай мукі, 1 шклянка вады, 1/4 шклянкі хлебнай закваскі, 2 цыбуліны, 1 сэльдэрэй, соль.

У каструлю ўліць ваду і хлебную закваску, давесьці да кіпеньня. Муку падсмажыць на патэльні (бяз тлушчу!) і, калі яна набудзе залацісты колер, зьлёгку разбавіць вадой, пасьля чаго ўліць у кіпячую ваду з закваскай. Гатаваць каля пяці хвілін. Сала нарэзаць кубікамі, цыбулю і сэльдэрэй — палоскамі. Сала падсмажыць з цыбуляй і сэльдэрэем, пасьля чаго перакласьці ў каструлю. Пасаліць, старанна перамяшаць і паставіць на 5—10 хвілін у нагрэтую духоўку.


Верашчака арыгінальная, «кухмістарская»


0,5 кг белай каўбасы, 2 лыжкі тлушчу, 1 цыбуліна, 1 лыжка белага віннага воцату, 1 шклянка піва, 1 шклянка мукі, соль, перац, цукар.

Каўбасу адварваць 30 хвілін у піве, разбаўленым вадой. Цыбулю дробна нарэзаць і падсмажыць на невялікай колькасьці тлушчу. Муку і тлушч падсмажыць да ўтварэньня зьлёгку падрумяненай масы, якую разьвесьці 1/2 шклянкі адвару ад каўбасы, якая гатуецца. Атрыманы соўс заправіць сольлю, перцам, цукрам і воцатам. Каўбасу парэзаць на кавалачкі даўжынёй некалькі сантымэтраў і дзесяць зь лішкам хвілін патушыць у соўсе на вельмі павольным агні.


Судак па-радзівілаўску


Адзін судак (2 кг), дзьве цыбуліны, адна морква, зяленіва пятрушкі, сельдэрэю, адзін ляўровы ліст, паўтары шклянкі белага сталовага віна, сок і цёртыя лупіны аднаго лімона, дзьве лыжкі паніровачных сухароў, тры лыжкі мукі, 100 г алею, 400 г шампіньёнаў.

Тры яечныя жаўткі, адна-дзьве лыжкі белага віна, адно яйка, 100 г ракавых шыек ці крэвэтак, адна мяккая булка, соль, перац.

На шэсьць—восем порцый марынаваньне — 30—40 хвілін, гатаваньне — адна гадзіна, кіпячэньне — 15—20 хвілін.

Падрыхтаць судака — абскрэбці, разабраць, выняць вантробы і шчэлепы. Адсячы галаву, хвост і плаўнікі, разрэзаць рыбіну ўздож хрыбта, дастаць філе, абдзерці скуру. Філе апырскаць лімонным сокам і пакінуць на паўгадзіны ў халодным месцы. Агародніну абабраць, памыць, пакласьці ў каструлю, заліць дзьвюма шклянкамі кіпню і гатаваць каля 30 хвілін на невялікім агні. Уліць віно, дадаць галаву, хвост, плаўнікі, хрыбет з касьцямі і скуру, а таксама ляўровы ліст, соль, перац і цёртыя лупіны лімона, гатаваць 20 хвілін. Працадзіць праз дробнае сіта ці марлю. З хваставой і бакавой частак філе адрэзаць 200 г мяса, перамяшаць зь дзьвюма лыжкамі сухароў, лыжкай мукі і лыжкай масла да атрыманьня аднароднай масы. Убіць яйка, старанна сфармаваць, дабавіць на смак соль і перац (калі маса занадта рэдкая, дабавіць сухароў). Вільготнымі далонямі сфармаваць невялікія катлеты, укачаць у муку, апусьціць у кіпячы адвар, гатаваць 2—3 хвіліны пасьля ўсплываньня. Выняць апалонікам, а адвар зноў ускіпяціць. Памытыя і высушаныя шампіньёны парэзаць на скрылёчкі і засмажыць у алеі (2 лыжкі). Рыбіна філе разрэзаць на восем аднолькавых порцый, апусьціць у адвар і гатаваць 10—15 хвілін на невялікім агні.

Згатаваную рыбу асьцярожна дастаць апалонікам, выкласьці на нагрэтае блюда, трымаць у цяпле. Адвар кіпяціць да той пары, пакуль не застанецца каля 2 шклянак, затым працадзіць празь сіта. Алей, які застаўся, адтапіць у пасудзіну, дабавіць муку, атрыманую масу разбавіць ахалоджаным расолам з рыбіны і гатаваць на малым агні, памешваючы, пакуль соўс не загусьцее. Дабавіць шампіньёны, катлеты і ракавыя шыйкі (крэвэткі). Падаграваючы на малым агні, заправіць сольлю і перцам, зьняць з агню і абліць разьмяшанымі ў лыжцы белага віна яечнымі жаўткамі. Мяккую булку парэзаць на восем аднолькавых лустаў, абсмажыць на гарачай патэльні. Гатовае філе пакласьці на грэнкі і паліць соўсам.

Крамбамбуля клясычная шляхецкая саматужная (з кнігі Ганны Шымандэрскай «На польскім стале», 2005):

20 г цынамону, 15 г чорнага перцу (зерне), па 10 г кардамону і гвазьдзікоў, 4 г мускатнага арэху, 3 шклянкі сьпірту, 2 шклянкі гарэлкі, 1 шклянка кіпеню, 1 кг мёду.

Патоўчаныя прыправы складаюць у слоік, заліваюць гарэлкай і сьпіртам. Закаркоўваюць і пакідаюць у цяпле на 8—10 дзён, штодзень моцна трасучы слоік. Мёд разводзяць у кіпені, вараць, здымаюць шум. Здымаюць з агню і асьцярожна даліваюць зьмесьціва слоіка, увесь час памешваючы. Хутка ахалоджваюць у рондалі з халоднай вадой. Фільтруюць, разьліваюць па бутэльках, закаркоўваюць і пакідаюць у цёмным халодным месцы на 4—6 месяцаў.

Рэцэпт крамбамбулі паводле Астрашэўскага:

Узяць паўлітра гарэлкі, адліць 100 г, зьмяшаць з такою ж колькасьцю вады. Разбоўтаць усё зь мёдам (1—2 сталовыя лыжкі). Мускатнага арэху дадаць зусім крыху. Цынамону — ня больш за 1 чайную лыжку (лепей — менш). Гвазьдзікоў — зусім крыху і ні ў якім разе не таўчы: гвазьдзік — рэч вельмі пахкая. Чырвоных перцаў дастаткова 1—2 — толькі каб на гэтым настойвалася крамбамбуля. Усё гэта кіпяціць 10 хвілінаў. Потым асьцярожна даліць астатнюю гарэлку і пакінуць у пасудзіне на 5 хвілінаў. Працадзіць праз 4 слаі марлі ў бутэльку, дадаць каліва чорнага перцу.





База данных защищена авторским правом ©urok.shkola.of.by 2016
звярнуцца да адміністрацыі

    Галоўная старонка